DxOMark mutaxassislari yangi Xiaomi 14T smartfonining displeyini sinovdan o‘tkazishdi. Ular ekranni bir necha ko‘rsatkichlar bo‘yicha baholashdi, jumladan rangni aniq yetkazib berish, ko‘rish burchaklari, sezgirlik va boshqa muhim parametrlar. Testlar natijasida aniq bo‘ldiki, ushbu qurilmaning displeyi iPhone 15 kabi ayrim modellardan ham ustun ekan.
Xiaomi 14T 6,67 dyuymli OLED displeyga ega bo‘lib, 2712×1220 piksellar aniqligi va 144 Gts yangilanish chastotasiga ega. Uy ichidagi sharoitlarda ekran juda yaxshi natijalarni ko‘rsatdi: ranglar aniq yetkazib beriladi, sensorli ekran tez va ishonchli javob beradi. Rang yetkazib berish ko‘rsatkichiga ko‘ra, Xiaomi 14T 157 ball to‘pladi, bu esa rekord darajadagi 165 ballga juda yaqin.
Biroq, ochiq havoda ekran muammolarga duch keladi. Quyoshli kunlarda displeyning yorqinligi yetarli bo‘lmaganligi tufayli matnni o‘qish qiyinlashadi. Shuningdek, HDR10 kontentni tomosha qilishda yorqinlik notekis va qoniqarsiz bo‘lib chiqadi. Testlarda, shuningdek, displeyning PVS chastotasi past baholandi, bu esa ko‘zni charchatishi mumkin.
Sinovlar natijalariga ko‘ra, Xiaomi 14T premium segmentda beshinchi o‘rinni egalladi va umumiy reytingda 38-pog‘onada joylashdi, u iPhone 15, iPhone 15 Plus va iPhone 13 Pro modellari, shuningdek, Xiaomi 14 ustidan ustunlik qildi.
Xiaomi 14T kuchli raqobatchi ekanini ko‘rsatdi va har qanday kamchiliklariga qaramay, displey jihatidan hatto iPhone kabi yangi modellardan ham oldinga chiqdi.